പാചകത്തെ കുറിച്ചുള്ള തർക്കം; യുപിയിൽ ഭർത്താവിന്റെ നാവ് കടിച്ചെടുത്ത് യുവതി

യുപിയിലെ ഗാസിയാബാദിൽ വാക്കുതർക്കത്തിനിടയിൽ ഭർത്താവിന്റെ നാവ് കടിച്ചെടുത്ത് യുവതി. പാചകവുമായി ബന്ധപ്പെട്ട തർക്കത്തിനിടയിലാണ് സംഭവം. ഇരുവരുടെയും വിവാഹം കഴിഞ്ഞിട്ട് ഒരു വർഷം പോലുമായിട്ടില്ലെന്നാണ് റിപ്പോർട്ടുകൾ പറയുന്നത്. ചൊവ്വാഴ്ചയാണ് സംഭവം. പരിക്കേറ്റ 26കാരൻ ഇപ്പോൾ ആശുപത്രിയിൽ ചികിത്സയിലാണ്.

മോദിനഗർ പൊലീസ് സ്റ്റേഷന് പരിധിയിലെ സഞ്ജയ്പുരിയിലാണ് സംഭവം. നാട്ടുകാർ അറിയിച്ചതിനെ തുടർന്നാണ് സംഭവ സ്ഥലത്തെത്തിയതെന്ന് മോദിനഗർ അസിസ്റ്റന്റ് പൊലീസ് കമ്മിഷണർ അമിത് സക്‌സേന പറയുന്നു. പുരുഷന്മാരും സ്ത്രീകളും അടങ്ങി രണ്ട് സംഘങ്ങൾ തമ്മിൽ വലിയ സംഘർഷമുണ്ടാകാൻ സാധ്യതയുണ്ടെന്നായിരുന്നു വിവരം. ഇതോടെ പ്രദേശത്ത് എത്തിയ പൊലീസ് ചിലരെ ചോദ്യംചെയ്യലിനായി സ്റ്റേഷനിൽ എത്തിക്കുകയും ചെയ്തു.